سپریٹنڈنگ انجینئر آپریشن میپکو ملتان سرکل امجد نوازبھٹی نے کہا ہے کہ صارفین کو سہولیات کی فراہمی ہماری اولین ترجیح ہے اس کے لئے ہر ممکن اقدامات اُٹھائے جارہے ہیں۔ دور جدید کے تقاضوں سے ہم آہنگ ہونے کے لئے صارفین کی شکایات کے اندراج و ازالہ اوردیگر سہولیات فراہم کرنے کے لئے ایک ہی چھت تلے تمام سروسز فراہم کردی گئی ہیں۔ میپکو ہیڈ کوارٹر اور ملتان سرکل آفس کے بعد بوسن روڈ اور ممتازآباد میں جدید طرز اور سہولیات سے آراستہ کسٹمرفیسیلیٹیشن سنٹرز قائم کئے گئے ہیں۔ ان خیالات کا اظہار انہوں نے بوسن روڈ پر واقع جدید کسٹمر فیسیلیٹیشن سنٹر (سی ایف سی)کا دورہ کرنے والے سیکرٹری ڈی ایچ اے ملتان بریگیڈیئر (ر) اطہر محمود کو بریفنگ دیتے ہوئے کیا۔ انہوں نے کہا کہ صارفین ہمارے لئے قابل احترام ہیں اور ان کے جائز مسائل حل کرنا ہمارا فرض ہے اس میں کوتاہی اور نااہلی ہرگز برداشت نہیں کی جائے گی۔ آن لائن جدید کسٹمر فیسیلیٹیشن سنٹر (سی ایف سی)میں صارفین کو مقررہ تاریخ میں توسیع، بل کی قسطیں، نئے کنکشن، ری کنکشن، نام کی تبدیلی، لوڈ کی تبدیلی، ٹیرف میں تبدیلی، بلوں میں اصلاحات اوردیگر بجلی سے متعلق تمام امور حل کئے جارہے ہیں۔ اس موقع پر ایکسین موسیٰ پاک ڈویژن غلام محی الدین میتلا اور ایڈیشنل ایکسین کسٹمرسروسز ملتان سرکل تاج محمود قمربھی موجود تھے۔