ملتان الیکٹرک پاورکمپنی (میپکو) ہارون آبادڈویژن بہاولنگر میں سیفٹی کلچر کے فروغ کے سلسلہ میں سیفٹی سیمینار کا انعقاد کیاگیا۔ایگزیکٹو انجینئرآپریشن میپکوہارون آبادڈویژن ناصر محمودنے کہا کہ سیفٹی سیمینارکے انعقاد کا مقصد لائن سٹاف میں دوران ڈیوٹی سیفٹی کے شعور کو اجاگر کرنا ہے۔ لائن سٹاف اپنی زندگی،اپنے خاندان اور بچوں کے مستقبل پرکسی قسم کا کوئی سمجھوتہ نہ کریں۔ ہمیشہ سیفٹی اصولوں کو مدنظر رکھتے ہوئے مکمل حفاظتی اقدامات کے ساتھ اپنے فرائض کوسر انجام دیں۔  فیلڈ میں کام کرنے سے قبل ٹی اینڈ پی چیک کریں اور کھمبوں /ٹرانسفارمرز پرکام کرنے سے پہلے پرمٹ ٹوورک ہرصورت حاصل کیاجائے۔لائنوں کوارتھ کرکے بجلی بندہونے کی تصدیق ہونے تک کام کاآغازنہ کیاجائے۔ ایس ڈی اوسیفٹی/ ٹریننگ غلام سروراورسیفٹی انسپکٹر ہیلتھ سیفٹی انوائرمنٹ میپکو ہیڈکوارٹرحمید الرحمن نے کہاکہ لائن مین ہمارے ہیرو ہیں۔ سیفٹی ہدایات پرمن وعن عمل کریں اوراپنے خاندان،بچوں کا خیال رکھیں۔اگر کسی ایس ڈی او/سپروائزر نے لائن سٹاف کو سیفٹی ہدایات کی خلاف ورزی کرنے اور لائنوں پرکام کرنے کے لئے مجبور کیاتوان کے خلاف سخت محکمانہ کاروائی کی جائے گی۔ ایس ڈی او سٹی سب ڈویژن ملک عمران فاروق، ایس ڈی او مسلم کالونی سب ڈویژن آصف گل اور یونین رہنما حسن ندیم نے کہاکہ سیفٹی ہدایات اور قوانین پر عمل کرنے سے ہی حادثات سے بچا جاسکتاہے۔ لائن سٹاف سیفٹی آلات کے بغیر ہرگزکام نہ کریں۔سیفٹی سیمینار میں سٹی اور مسلم کالونی سب ڈویژنوں کے تمام سپروائزری اور لائن سٹاف نے شرکت کی۔ بعدازاں ایکسین ہارون آبادڈویژن نے مینٹیننس سٹاف کو ٹرانسفارمرز مینٹیننس،لائن بلڈنگ کراسنگ اور سیفٹی خطرات دور کرنے اور ریکارڈ مرتب کرنے کے متعلق نوٹ بکس اور رہنمائی دی۔دوران ڈیوٹی شہید ہونے والے اہلکاروں کی مغفرت اور لائن سٹاف کی سلامتی کے لئے دعابھی کی گئی۔